fbpx
صوت التلميذ التونسي

غفران الهنداوي : كيفاش جبت 18،48 في الباك !

0 14٬831

الطالبة غفران الهنداوي تتحدث عن طريقة نجاحها و تفوقها في الباكالوريا السنة الفارطة بمعدل 18,48 .:
“السلام عليكم و رحمة الله وبركاته جماعة الباك الكل
في طُمْبك الdépression الي عايشتها جرة المدسين تفكرتكم 😁😁
قلت خلي نعطيكم شوي نصائح بما أنني عشت نفس تجربتكم ونعرفو شنوا تحسو 😌
طويل شوي اما ميسالش بربي اقراوه الكل 😃
• أولا الجماعة الي ضيعو سيماستر لولا عادي جدا متقولش لا ما نخلطش ولا فاتني الفوت ..
عادي جدا تكون مضيع اول العام طي تمد ااكور الي فاتك في ها الجمعتين وتعملو ملخص وتخدم حتى exercice ولا زوز تنشط باهم مخك تخلط بإذن الله..
• ثانيا حاولو تنظمو اوقاتكم يعني متخليش روحك اكاكا على الهامش وظالا شادين جمعة كاملة تخدموا في مادة برك وتشوف تلقا روحك مضيع المواد الاخرين انا مثلا كنت عاملة جدول كل نهار شناوا نقرا ديجا هاني صورتو وهبطتو ..
يعني ماذابيك كل درس في المواد الأساسية مات فيزيك علوم دوب ما تكملوه في القسم تعاود وحدك تقراه وتعملو ملخص انا ما نجم نقرا كان بالملخصات خاصة في المواد هذي
• ثالثا لازم أنت تكون عارف روحك مليح وتكون عارف سيستام قرايتك وكيفاه تقرا منغير لا تبقى تتبع في غيرك يعني ثما شكون ينجم يقرا الصباح ثما شكون يحب يصبّح يقرا ويصبح راقد كل حد وكيفاه.. هههه انا مثلا مستحيل نجم نقرا الصباح بكري ديما حتى نحاول نقرا الصباح نرقد فوق الطاولة الله غالب منجمش.. ساعات كي نروح 18 نتعشا ونتفرج شوي على التلفزة ونكنكتي وبعد نمد نقرا مع 00 ولا 00:30 نمشي نرقد ونقوم الصباح نمشي لليسي وساعات نروح نحس روحي ياسر تاعبة نصلي العشاء 19 ونرقد ونقوم 00 نقرا لل3:30 متاع الصباح (يبدى هدووء تام في الدار حس ما ثماش لا تلفزة لا حس خواتي لا صغار اختي ههه ) ونرجع نرقد وبعد كالعادة نفيق نمشي نقرا.. المهم مش نبقا ما تقراش ما تقراش وبعد تجي تنزل على روحك تعدي des nuits blanches .. اكثر حاجة لازمتك هي النوم والراحة وتكون تقرا وانت مرتاح راك ظالا تقرا وانت ناقص نوووم راك تولي كالكسكاس المنقوب الي تقراه ما تشدووش.. اقرا بنظام ما تضيعش تخلط باذن الله وانت مخك مرتاح .. وزيد ردوا بالكم تخدموا للدفورات راكم تخدموا للباك مش ظالا عندكم دفوار مات ولا فيزيك تشدو جمعتين تخدموا المادة هكي وبعد تلقاو الكور تكدس عليكم.. انا كنت ياااسر ملتزمة بالجدول متاع وسط العام واذا كان عندي دفوار ونخدملو نهارين على حساب مادة اخرى.. المادة هكي ما تتعدا الجمعة هذيكا الا عوضتها المادة خاطر نعرف روحي اذا درس في مادة معينة فتوا صعيييبب نرجعلو..
•رابعا عادي راو كي تحس روحك خدمت بارشا وتحس نفسك مايلة للراحة وفدت نبقى جمعة كاملة ما نخدم شي فقط نحضر للكور ونروح نتفرج اما ما تطولوش عاد جمعة مش شهرين ههه
•خامسا حاجة مهمة.. رد بالك تقول انا خايب في أكا المادة كهو تطيشها وراء ظهرك وتقول لا ما نخدمهاش انا خايب خايب.. متكونش انسان فاشل وضعيف بل قل نحن الاباة ونحن لها.. مش مادة باش تغلبك 👊👊 أنت ربي اعطاك قوة وإيمان لازم تؤمن بنفسك.. انا مثلا كنت لا علاقة في الانڨليزية وديما تحت 10 وكي نجيب فوق ال10 نفرح تقول عاملة عرس واصلا اول دفوار في الباك خذيت 9 عادي اصلا تعودت باها.. بعد في السيماستر الثانية قلت انا غفران باش تغلبك مادة؟ لا.. دعيت ربي وبديت نريفز فاها و عملت ملخص للقواعد نتفكر استاذتي مادام جيهان، الي كانت ديما تشجع فيا وتقلي تو ترى انت قداه تاخو وكنت نضحك نقلها اي بالضبط قداش نحبها بارشا، شافت مرة الملخص متاعي قتلي انت اول تلميذة شفتها عملت ملخص يعطك الصحة.. تعرفو في الباك قداه جبت؟ جبت 19 اي اي بعد ال9 جبت 19 رغم انو مش ساهل جا وجبت اكثر نوت في الانقليزية في الليسي بيلوت كامل فرحت باها اكثر من معدلي هههه.. يعني فقط آمن بنفسك واخدم…
• سادسا ردو باااالكم تكثرو من الدروسات درس واحد في كل مادة اساسية يزي مش لزمة دوبل ما نحكيش علي يقراو تريبل خاطر هاكم ما عندهمش مخاخ وكان فلوسك بزايد تحب تصرفها شوف زميلك ما في حالوش وخلص عليه درس مات ولا فيزيك تربح دعوة خير انفعلك 😊😊 .. اسأل على البروف الي تراه باهي وادخل عندو يزي وماذابيك ما تعملش ياسر على الدروسات عمل على خدمتك انت وماذابيك قبل كل etude تكون اضعف الايمان قاري كورك مليييح والحاجات الي مش فاهمهم تڨمرهم وتسأل البروف.. بالطبع الي يمشي خادم السيري خير ببااااارشا باش تعرف روحك فاش تغلط وكل.. وكانك تحب تدخل درس في احدي المواد الي ضارب 1 ادخل من تو وما تعملش غلطة بارشا عباد تقول لا تو ندخل وقت الريفيزيون رد بالك راو ريفيزيون ظالا stressé من غصرة الوقت تزيد تكمل تغصر روحك ما يجيش..
• سابعا ننصحكم في الريفيزيون ما تعمل حتى étude سي بون قريت عامل كامل يزيييك خلي وقت لنفسك.. كان طارت اعمل في مادة برك مثلا جماعة العلوم التجريبية يعملو سيونس فقط.. جماعة المات يعملو مات فقط… انا مثلا عملت كان سيونس وقريت حصتين info والحمدلله الانقليزية بروفتنا كملتلنا على بكري قبل الرفيزيون وقلنالها حتى اعمللنا حصة قالت لا راجع وحدك خير وفعلا كلامها صحيح.. واعملو جدول ديجا هاني صورتو وهبطتو الجدول متاعي رغم انني انا ما التزمتش بيه بارشا خاطر شطر ريفيزيون بدا رمضان والوقت تبدل ههه اما انتوما حاولوا اعملو جدول يساعدكم وفي الريفيزيون ركزوا بالباهي على المواد الي ما عطيتوهاش حقها وسط العام .. مثلا انا المات خدمتو مليح وسط العام وقت الريفيزيون ما خدمتوش بارشا تلهيت بحاجات أخرى
• ثامنا كان قدر ربي وما خلطش في بعض المواد وكملتها مش تخافش وما تدخلش بعضك اخزر للجانب المشرق انك كملت مواد اخرى .. انا مثلا الفلسفة وقت الريفيزيون رغم انني حطيتها في الجدول ما خلطش باش نمدها جملة لين وصلت قبل لا نعداها بنهار مديتها ووليت نبكي علللخر وقلت لا قريتها حتى قراية وحدة وغيري قاري étude philo وحافظها وبقيت نخزر ونبكي اكاكا وحدي وبعد استغفرت ربي وصليت ركعتين ودعيت ربي وقريتها مرة برك ليلة الامتحان ودخلت عديت نكتب من مخي خاطر ما حفظتش فقط فاهمة شوي سبحان الله خذيت 16.25 اكثر ملي حافظينها!!
• تاسعا وأخيرا انت خووذ بالاسباب واقرا واجتهد ووكّل امرك كلو لربي وقل اللهم اني وكلت امري اليك فكن لي خير وكيل ودبر لي امري فانني لا احسن التدبير.. لاباس والله ربي ما يضيعلكش تعب وسهر.. اكثروا من الاستغفار والله يشرح الصدر كل ما تحس روحك فديت.. وردك من القرآن كل يوم حتى درجيين مش بارشا يفرهدوك.. اخلص النية انك بخدمتك وتخصصك نهار آخر انك تحب تبدل حاجة في الدنيا هذي وتخدم أمّتك.. ومن يصدق الله يصدقه..
نعرف تعب ياسر وضغط اكثر واكثر اما والله وقتلي جاني الميساج فيه 18.48 نسيت التعب نسيت المرواح في البرد موخر نسيت كيفاه تبلو سيريات الفيزيك وانا ماشية نقرا etude تحت المطر خاطر سحابتي تكسرت وبعد نطلع ما نقراش .. عادي تنساااه هكا الكل والله..
ربي يوفقكم الناس الكل وينجحكم ويحقق احلامكم.. أسأله سبحانه أن يستعملكم فيما يرضيه وتكونون ذخرا ولبنة طيّبة..
سامحوني كان طولت عليكم.. وان شاءالله تكون نصائحي مفيدة.. بربي انشروها بين صحابكم الي يقرااو باك..
السلام عليكم ورحمة الله وبركاته ”


تعليقات
Loading...

غفران الهنداوي : كيفاش جبت 18،48 في الباك !

كتبه Rayen Bouajaja دق وقت قراءة <1 min
0